ఒకటేమో ప్రపంచంలోనే పవర్ఫుల్ కంట్రీ. అతి పెద్ద దేశాల్లో మూడోది కూడా. మరొకటేమో ఇంటర్నేషనల్ బిజినెస్ సెక్టార్లోని నాలుగు ఆసియా సింహాల్లో ఒకటి. దక్షిణాసియాలోని చిన్న దేశమూ అదే. ఈ రెండూ ‘పోటీ’లోకి దిగితే ఎవరు ముందుంటారు?. సహజంగా పెద్దది, శక్తిమంతమైనదే పైచేయి సాధిస్తుంది. కానీ.. ఇక్కడ సీన్ రివర్స్ అయింది. చిన్నదే స్పీడ్గా దూసుకుపోయింది. వెనకబడ్డ దేశం అమెరికా కాగా, దాన్ని ఓవర్టేక్ చేసింది సింగపూర్ కావటం విశేషం.
ఎకానమీ అభివృద్ధికి సంబంధించి ఇతర దేశాలు అందుకోలేని ఎత్తున ఉండే అమెరికా ఈసారి బోల్తా కొట్టింది. గతేడాది మాదిరిగా పెర్ఫార్మెన్స్ ఇవ్వలేకపోయింది. బిజినెస్కు అన్నిరకాలుగా, అనుకూలంగాఉండే దేశాన్ని కాంపిటీటివ్ కంట్రీగా చెబుతారు. గ్లోబల్ కాంపిటీటివ్ ఇండెక్స్లో కిందటేడాది నెం–1 ప్లేస్లో నిలిచిన అమెరికా ఇప్పుడు రెండో మెట్టు దగ్గరే ఆగిపోయింది. సింగపూర్ అగ్ర స్థానాన్ని దక్కించుకుంది. మోడ్రన్ ఇన్ఫ్రాస్ట్రక్చర్కి తోడు లేబర్, మేనేజ్మెంట్ మధ్య కో–ఆపరేషన్ అద్భుతంగా ఉండటం సింగపూర్కి కలిసొచ్చింది. వరల్డ్ ఎకనమిక్ ఫోరం (డబ్ల్యూఈఎఫ్) చేపట్టిన స్టడీలో మొత్తం 141 దేశాల ఆర్థిక వ్యవస్థలతో పోటీపడి సింగపూర్ తనకుతానే సాటి అని నిరూపించుకుంది. గ్లోబల్ కాంపిటీటివ్ రిపోర్ట్లో తానే టాప్ అని చాటుకుంది. మొత్తం 103 అంశాలపై నివేదికను రూపొందించగా, ముఖ్యంగా రెండు అంశాల్లో అమెరికా వెనకబడింది. సింగపూర్లో ఆరోగ్యవంతమైన జీవిత కాలం, 21వ శతాబ్దానికి కావల్సిన స్కిల్స్ ఉన్నాయని, అమెరికా ఆ దిశగా ప్రయత్నించడం లేదని రిపోర్ట్ పేర్కొంది.
ఇన్నోవేషన్లో ముందుంటే తిరుగుండదు
టాప్–5 దేశాల్లో అమెరికా తర్వాత హాంకాంగ్, నెదర్లాండ్స్, స్విట్జర్లాండ్లకు చోటు లభించింది. ర్యాంకులను నిర్ణయించటానికి డబ్ల్యూఈఎఫ్ 103 ఇండికేటర్లను బేస్ చేసుకుంది. వాటిని హెల్త్, ఫైనాన్షియల్ సిస్టమ్, మార్కెట్ సైజ్, బిజినెస్ డైనమిజం, ఇన్నోవేటివ్ కెపాసిటీ వంటి 12 కేటగిరీలుగా విభజించింది. అమెరికా మిగతా ఇండికేటర్లలో ఎలా ఉన్నప్పటికీ ఇన్నోవేటివ్ పవర్ హౌస్గా మరోసారి తన పొజిషన్ని నిలుపుకుంది.
కాంపిటీటివ్ ఎకానమీగా అగ్రస్థానంలో నిలబడాలంటే ఇన్నోవేషన్లో ముందుండటం చాలా ముఖ్యమని డబ్ల్యూఈఎఫ్ ఫౌండర్ క్లాజ్ ష్కాబ్ అభిప్రాయపడ్డారు. వరల్డ్ ఎకానమీలో ఏడాది కాలంగా కొన్ని ఆపరేటివ్ ఫ్యాక్టర్లు కీలకంగా మారాయని, వాటి ప్రభావాన్ని ఇప్పుడే అంచనా వేయటం తొందరపాటు అవుతుందని రిపోర్ట్ని రూపొందించినవారు అంటున్నారు. అమెరికా, చైనా ట్రేడ్ వార్ ముదురుతుండటంతో ట్రిలియన్ డాలర్ల విలువైన సరుకులపై దిగుమతి టారిఫ్లు ఆకాశాన్ని అంటుతున్నాయని గుర్తు చేశారు.
ఇద్దరు కొట్టుకుంటే మూడో వాడికి లాభం
రెండు దేశాల వ్యాపార తగాదాలు మూడో దేశానికి అనుకూలంగా మారుతున్నాయి. బిజినెస్ విషయంలో చైనాకు ఆల్టర్నేటివ్ ఏంటా అని చూస్తున్నారు. ఇలా ఆలోచించేవారికి వెంటనే వియత్నాం కనిపిస్తోంది. 2018లో కాంపిటీటివ్ ఇండెక్స్లో 77వ ర్యాంక్ తెచ్చుకున్న ఈ దేశం ఏడాదిలోనే పది పాయింట్లు పెరిగి 67కి చేరింది. ఇద్దరు కొట్టుకోవటం మూడోవాడికి లాభమనటానికి ఇదే నిదర్శనమని డబ్ల్యూఈఎఫ్ అనుబంధ సంస్థ ‘సెంటర్ ఫర్ ది న్యూ ఎకానమీ అండ్ సొసైటీ’ హెడ్ సాదియా జాహిది అన్నారు. చైనా–అమెరికా ట్రేడ్ వార్ నేపథ్యంలో వియత్నాం చెప్పుకోదగ్గ సంఖ్యలో ఇన్వెస్ట్మెంట్లను ఆకర్షిస్తోంది. తద్వారా రీజనల్ ట్రేడింగ్ హబ్గా ఎదిగేందుకు ప్రయత్నిస్తోంది. కాంపిటీటివ్నెస్పై టారిఫ్ల పూర్తి ప్రభావాన్ని అనాలసిస్ చేయటానికి సరిపోయే సమాచారం అందుబాటులో లేదని జాహిది చెప్పారు. అయితే బిజినెస్ సెంటిమెంట్ తగ్గుముఖం పట్టడానికి రెస్ట్రిక్టివ్ ట్రేడ్ మెజర్సే కారణమని తెలిపారు. వీటివల్లే ఈసారి ర్యాంకుల్లో ఇండియా పది పాయింట్లు దిగజారిందనే అభిప్రాయం వ్యక్తమవుతోంది.
