నిజామాబాద్, వెలుగు: కొనుగోలు కేంద్రాల నుంచి వచ్చిన వడ్లను దింపుకోకుండా రైతులను ఇబ్బంది పెట్టే మిల్లర్ల పట్ల కఠినంగా వ్యవహరిస్తామని జడ్పీ చైర్మన్ దాదన్నగారి విఠల్రావు హెచ్చరించారు. బుధవారం జిల్లా కేంద్రంలోని జడ్పీ మీటింగ్హాల్లో విఠల్రావు అధ్యక్షతన జిల్లా పరిషత్ సర్వసభ్య సమావేశం జరిగింది. అడిషనల్కలెక్టర్ చిత్రామిశ్రా, ఐడీసీఎంఎస్ చైర్మన్మోహన్, గవర్నమెంటు హాస్పిటల్సూపరింటెండెంట్డాక్టర్ ప్రతిమారాజ్ ఆయా శాఖల ఆఫీసర్లు పాల్గొన్న ఈ సమావేశంలో సభ్యులు ఆయా శాఖల ఆధ్వర్యంలో తలెత్తుతున్న సమస్యలను సభ దృష్టికి తీసుకు వచ్చారు.
కొనుగోలు కేంద్రాల నిర్వహణపై..
సభ్యులు ముందుగా వడ్ల కొనుగోలు కేంద్రాల నిర్వహణపై జిల్లా కోఆపరేటివ్ఆఫీసర్ సింహాచలంపై ప్రశ్నల వర్షం కురిపించారు. దీనిపై ఆయన స్పందిస్తూ.. కొనుగోలు కేంద్రాల నిర్వహణను సునిశితంగా పరిశీలిస్తున్నామని, సూపర్వైజింగ్ ఆఫీసర్లను నియమించామని చెప్పారు. జిల్లాలోని సహకార సంఘాలపై వస్తున్న అవినీతి ఆరోపణల గురించి కోటగిరి జడ్పీటీసీ మెంబర్శంకర్పటేల్ప్రశ్నించగా, సెక్షన్– 60 ప్రకారం తనకు సొంతంగా విచారణ నిర్వహించి నిర్ణయాలు తీసుకునే అధికారం ఉందని, విచారణ చేపడుతామని డీసీవో సమాధానం ఇచ్చారు. తాళ్లరాంపూర్ సొసైటీపై 48 హియరింగ్ లు చేశామని, అందుకే పాలకవర్గం ట్రిబ్యునల్కు వెళ్లినా వారికి అనుకూల ఉత్తర్వులు రాలేదన్నారు. కొత్తపల్లి సింగిల్ విండోపై థర్డ్పార్టీ విచారణ జరిపించాలని డీసీవో కలెక్టర్ రాజీవ్గాంధీ హన్మంతును కోరగా ఆయన అంగీకరించారు.
రైతులకు నష్టపరిహారంపై చర్చ
జిల్లాలోని అంగన్వాడీ కేంద్రాలకు కోడిగుడ్లు, పప్పులు సరఫరా కావడం లేదని, బియ్యం సరఫరాలో సమస్యలు తలెత్తున్నాయని జడ్పీ వైస్ చైర్ పర్సన్రజితా యాదవ్సభ దృష్టికి తెచ్చారు. మహిళా ప్రతినిధులను కొందరు ఆఫీసర్లు చులకనగా చూస్తున్నారని చైర్మన్ దృష్టికి తెచ్చారు. అనంతరం డిసెంబర్ 2021, జనవరి 2022 అకాల వర్షాలతో పంట నష్టపోయిన రైతుల పరిహారం.. గురించి సభ్యులు ప్రశ్నించగా, బాధిత రైతుల బ్యాంకు అకౌంట్లను పరిశీలిస్తున్నామని నిర్ధరణ తరువాత పరిహారం పైసలు వారి ఖాతాలో జమచేస్తామని జిల్లా వ్యవసాయ శాఖ అధికారి తిరుమల ప్రసాద్ చెప్పారు. ఇటీవల పంట నష్టం రిపోర్టును ప్రభుత్వానికి పంపామన్నారు. ఇప్పటి వరకు రూ.38 వేల లోపు క్రాఫ్లోన్లకు పైసలు జమచేశామని తెలిపారు.
ఇసుక తవ్వకాలపై ప్రశ్నించిన సభ్యులు
తహసీల్దార్లు పర్మిషన్ఇచ్చిన 23 పాయింట్ల వద్ద ఇసుక తవ్వకాలు నడుస్తున్నాయని, గనుల శాఖ ఎక్కడా పర్మిషన్లు ఇవ్వలేదని మైన్స్ ఏడీ సత్యనారాయణ సభ్యుల ప్రశ్నలకు సమాధానంగా చెప్పారు. మొరం, ఇసుక తవ్వకాలకు చెందిన సీనరేజ్ఛార్జీల వాటా రూల్స్ప్రకారం జడ్పీ, ఎంపీపీ, పంచాయతీలకు జమచేస్తామని కలెక్టర్ రాజీవ్గాంధీ హన్మంతు తెలిపారు. రిజిస్ట్రేషన్ పైసలు ప్రభుత్వానికి వెళ్తాయని, స్థానిక సంస్థలకు ఇందులో ఎలాంటి వాటా ఉండదని జడ్పీ సీఈవో గోవింద్నాయక్ సభ్యుల ప్రశ్నకు జవాబు చెప్పారు. ‘ధరణి’ సమస్యలపై 33 మాడ్యుల్లో అప్లై చేయాలని కలెక్టర్ సూచించారు.
నిజాం షుగర్స్ భూములపై పది రోజుల్లో క్లారిటీ..
బోధన్ నిజాం షుగర్స్ నుంచి ఎస్సీ, ఎస్టీ, బీసీ, మైనారిటీ కార్పొరేషన్లు గతంలో కొనుగోలు చేసి లబ్ధిదారులకు పంచిన భూముల అమ్మకాల రిజిస్ట్రేషన్ చేయడం లేదని కొందరు సభ్యులు ప్రశ్నించగా.. దీనిపై ప్రభుత్వం నుంచి పది రోజుల్లో క్లారిటీ వస్తుందని కలెక్టర్ తెలిపారు. ఉపాధి హామీ పనులను రైతులకు ఉపయోగపడేలా చేయించాలని సభలో నిర్ణయించారు. ఎలక్ట్రిసిటీ శాఖపై జరిగిన చర్చలో శిథిలమైన, వంగిన కరెంటు స్తంభాలను మారుస్తామని ట్రాన్స్కో ఎస్ఈ రవీందర్ తెలిపారు.
