న్యూఢిల్లీ, వెలుగు : ఎస్సీ రిజర్వేషన్ల వర్గీకరణపై కేంద్రంతోపాటు, తెలంగాణ, ఏపీ రాష్ట్రాలకు సుప్రీంకోర్టు నోటీసులు జారీ చేసింది. ఎస్సీ రిజర్వేషన్ల వర్గీకరణ చేపట్టాలని మాదిగ రిజర్వేషన్‌ పోరాట సమితి (ఎమ్మార్పీస్‌) సుప్రీంకోర్టును ఆశ్రయించింది. ఈ పిటిషన్ ను సీజేఐ జస్టిస్‌ ఎన్వీ రమణ ఆధ్వర్యంలోని ముగ్గురు సభ్యుల బెంచ్ బుధవారం విచారణ జరిపింది. ఎస్సీ కులాల్లో ఒక వర్గం జనాభా ఎక్కువ ఉన్నా తగిన రిజర్వేషన్లు పొందలేకపోతోందని పిటిషనర్తరపు న్యాయవాది పేర్కొన్నారు. దీనిపై సీజేఐ జోక్యం చేసుకొంటూ.. ఎస్సీల్లో రిజర్వేషన్ల అంశంపై ఈవీ చిన్నయ్య కేసులో సుప్రీంకోర్టు ఏడుగురు జడ్జీలతో రాజ్యాంగ ధర్మాసనం ఏర్పాటు చేసిందని తెలిపారు. రాజ్యాంగ ధర్మాసనానికి కేసు విచారణ వేగవంతం చేయాలని సూచించలేమన్నారు.
