- ఉమ్మడి ఆదిలాబాద్ జిల్లాలో గెలిచిన వారికి చోటు కల్పించాలి
- సీఎం రేవంత్కు తెలంగాణ మాల సంఘాల ఫోరం విజ్ఞప్తి
హైదరాబాద్, వెలుగు: అత్యంత వెనుకబడిన ఉమ్మడి ఆదిలాబాద్జిల్లా బాగుపడాలంటే.. ఆ జిల్లా నుంచి గెలిచిన ఎస్సీ ఎమ్మెల్యేకు మంత్రివర్గంలో చోటు కల్పించాలని తెలంగాణ మాల సంఘాల ఫోరం సీఎం రేవంత్ రెడ్డికి విజ్ఞప్తి చేసింది. ఈ మేరకు బుధవారం ఫోరం అధ్యక్ష, ప్రధాన కార్యదర్శులు కుంచకారి బాలకృష్ణ, పులి మోహన్ఓ ప్రకటన విడుదల చేశారు. ‘‘రాష్ట్రంలో అన్ని జిల్లాలతో పోలిస్తే ఉమ్మడి ఆదిలాబాద్ జిల్లా ఎటువంటి అభివృద్ధికి నోచుకోలేదు. అన్ని రంగాల్లో వెనుకబడింది. ప్రజలకు విద్య, వైద్య సౌకర్యం, తాగునీరు, రేషన్ కార్డులు, ఇతర మౌలిక వసతులు లేవు. ఎస్సీ, ఎస్టీ, బడుగు, బలహీనవర్గాల ప్రజలు ఆ జిల్లాలోనే ఎక్కువ నివసిస్తున్నారు. అలాంటి జిల్లా అభివృద్ధి చెందాలన్నా.. ప్రజల గోడు వినాలన్నా.. ఆ జిల్లా నుంచి గెలిచిన ఎస్సీ అభ్యర్థికి మంత్రి వర్గంలో చోటు కల్పించడం అత్యంత ఆవశ్యకం. దీంతో ఆ జిల్లా ప్రజలకు న్యాయం చేసినట్టవుతుంది.
కేబినెట్లో తొలుత ఉమ్మడి ఖమ్మం, నల్గొండ, మహబూబ్నగర్, వరంగల్, కరీంనగర్, మెదక్ జిల్లాల నుంచి ఎన్నికైన వారికి అవకాశం కల్పించారు. ఆదిలాబాద్కు ప్రాతినిధ్యం లేదు. అందుకే ఈసారి కేబినెట్ బెర్తుల్లో ఆ జిల్లాకు కచ్చితంగా ప్రాధాన్యం ఇవ్వండి. గతంలో కాంగ్రెస్ ప్రభుత్వం ఎమ్మెల్యేలుగా గెలిచిన ఎస్సీ, ఎస్టీలకు దామాషా ప్రకారం మంత్రివర్గంలో చోటు ఇచ్చింది. అదే తరహాలో సీఎం రేవంత్ రెడ్డి కూడా ఎస్సీలకు తగిన ప్రాధాన్యం ఇవ్వాలని మాల సామాజిక ప్రజల తరఫున విజ్ఞప్తి చేస్తున్నాం’’ అని వారు లేఖలో పేర్కొన్నారు.
