న్యూఢిల్లీ: పహల్గాం ఉగ్రదాడికి కౌంటర్ గా భారత్ ఆపరేషన్ సిందూర్ చేపట్టిన విషయం తెలిసిందే. ఈ ఆపరేషన్ తర్వాత దాయాది పాక్ దేశం భారత్పై వందల సంఖ్యలో డ్రోన్లు, పదుల సంఖ్యలో మిసైళ్లతో దాడులకు ప్రయత్నించింది. పాక్ దాడులను భారత ఎయిర్ డిఫెన్స్ సిస్టమ్ సమర్థవంతంగా తిప్పికొట్టింది. అయితే.. పాక్ భారీగా డ్రోన్ల దాడులకు ప్రయత్నిస్తుండటంతో భారత్ అప్రమత్తమైంది. ఈ నేపథ్యంలో స్వదేశీ కౌంటర్ డ్రోన్ వ్యవస్థను విజయవంతంగా భారత్ ప్రయోగించింది. హార్డ్ కిల్ మోడ్‌లో తక్కువ ఖర్చుతో సోలార్ డిఫెన్స్ అండ్ ఏరోస్పేస్ లిమిటెడ్ (SDAL) రూపొందించిన స్వదేశీ కౌంటర్-డ్రోన్ వ్యవస్థ భార్గవస్త్రను 2025, మే 13న భారత్ పరీక్షించింది.
ఒడిశాలోని గోపాల్‌పూర్‌లో ఆర్మీ ఎయిర్ డిఫెన్స్ (AAD) సీనియర్ అధికారుల సమక్షంలో ఈ రాకెట్ కోసం మూడు పరీక్షలు నిర్వహించారు. రెండు ప్రయోగాల్లో ఒకొక్క రాకెట్ను పరీక్షించగా.. మరో ప్రయోగంలో 2 సెకన్లలోపు సాల్వో మోడ్‌లో రెండు రాకెట్‌లను టెస్ట్ చేశారు. మొత్తం నాలుగు రాకెట్లు నిర్దేశించిన లక్ష్యాలను అత్యంత కచ్చిత్వంతో సాధించాయని.. భార్గవస్త్ర కౌంటర్-డ్రోన్ వ్యవస్థ పరీక్షలు విజయవంతమైనట్లు అధికారులు బుధవారం (మే 14) వెల్లడించారు. ఇది డ్రోన్ సమూహాల ముప్పును గణనీయంగా ఎదుర్కొంటుందని తెలిపారు.
భార్గవాస్త్ర ప్రత్యేకతలు:
స్వదేశీ పరిజ్ఞానంతో రూపొందించబడిన భార్గవాస్త్ర 2.5 కి.మీ దూరంలో ఉన్న చిన్న, ఇన్‌కమింగ్ డ్రోన్లను గుర్తించి ధ్వంసం చేయగలదు. ఇది 20 మీటర్ల రేడియస్లో డ్రోన్ల సమూహాన్ని న్యూట్రలైజ్ చేయడానికి మొదటి రక్షణ పొరగా గైడెడ్ మైక్రో రాకెట్‌లను కలిగి ఉంది. రెండవ పొరగా గైడెడ్ మైక్రో-క్షిపణిని ఉపయోగిస్తూ అత్యంత ఖచ్చిత్వంతో శత్రువుల డ్రోన్లను నేలకూల్చగలదు. సముద్ర మట్టానికి 5000 మీటర్ల ఎత్తులో ఉన్న ఎత్తైన ప్రాంతాలతో సహా విభిన్న ప్రాంతాల్లో సులభంగా మోహరించేలా ఈ వ్యవస్థ రూపొందించబడింది.
ఈ వ్యవస్థ మాడ్యులర్ అన్ని సాయుధ దళాల విభాగాలకు సమగ్ర కవచాన్ని అందించడానికి జామింగ్, స్పూఫింగ్‌ను చేర్చడానికి అదనపు సాఫ్ట్-కిల్ పొరను కలిగి ఉంటుంది. భార్గవాస్త్ర సెన్సార్లు (రాడార్, EO & RF రిసీవర్) మాడ్యులర్‌గా ఉంటాయి. లేయర్డ్, టైర్డ్ ఏడీ కవర్ కోసం ఇంటిగ్రేటెడ్ పద్ధతిలో పనిచేసేలా ఉపయోగించవచ్చు. అధునాతన C4I (కమాండ్, కంట్రోల్, కమ్యూనికేషన్స్, కంప్యూటర్స్ మరియు ఇంటెలిజెన్స్) సాంకేతికతను కలిగి ఉన్న అధునాతన కమాండ్-అండ్-కంట్రోల్ సెంటర్‌తో అమర్చబడిన భార్గవాస్త్ర రాడార్ 6 నుంచి 10 కి.మీ దూరంలో ఉన్న వైమానిక ముప్పులను పసిగట్టగలదు.
దీని ఎలక్ట్రో-ఆప్టికల్/ఇన్‌ఫ్రారెడ్ (EO/IR) సెన్సార్ సూట్ తక్కువ రాడార్ క్రాస్-సెక్షన్ (LRCS) లక్ష్యాలను ఖచ్చితంగా గుర్తించడానికి సహయపడుతోంది. విదేశాల నుంచి తెచ్చుకున్న అత్యాధునిక డ్రోన్లతో పాక్ దాడులకు పాల్పడుతోన్న వేళ.. స్వదేశీ పరిజ్ఞానంతో రూపొందించిన స్వదేశీ కౌంటర్ డ్రోన్ వ్యవస్థను భారత్ విజయవంతంగా పరీక్షించడం చర్చనీయాంశంగా మారింది. ఈ పరీక్షల ద్వారా పాక్ కు భారత్ పరోక్ష హెచ్చరికలు పంపిందని పలువురు విశ్లేషకులు అభిప్రాయపడుతున్నారు.
