హాలియా, వెలుగు: తెలంగాణ పర్యాటక అభివృద్ధి సంస్థ ఆధ్వర్యంలో నాగార్జునసాగర్ నుంచి శ్రీశైలం వరకు కృష్ణా నదిలో ఏర్పాటు చేసిన లాంచీని శనివారం నాగార్జునసాగర్ లో తెలంగాణ టూరిజం వాటర్ ఫ్లూయిట్ జనరల్ మేనేజర్ మాన్వి ప్రారంభించారు. ఈ సందర్భంగా ఆమె మాట్లాడుతూ సాగర్ నుంచి శ్రీశైలం వరకు 110 కిలోమీటర్లు కృష్ణా నదిలో ప్రయాణం పర్యాటకులకు ఆహ్లాదాన్ని కలిగిస్తుందన్నారు.
ఈ సీజన్లో మొదటిసారి శ్రీశైలం వెళ్తున్న లాంచీలో జీఎం మాన్వి, సాగర్ లాంచీ యూనిట్ మేనేజర్ హరి, టూరిజం అధికారి రాజేశ్ ప్రయాణించారు. ఉదయం 9 గంటలకు 30 మందితో హిల్ కాలనీ నుంచి బయలుదేరిన లాంచీ సాయంత్రం 6 గంటలకు శ్రీశైలం చేరుకుంటుంది. రాత్రి శ్రీశైలంలో బస చేసి ఆదివారం ఉదయం మల్లికార్జునస్వామిని సందర్శకులు దర్శించుకుంటారు. అనంతరం శ్రీశైలం నుంచి సాగర్ కు లాంచీ తిరిగి బయలుదేరుతుంది.
