ఓ పెద్దాయన కూరగాయల సంచితో నడుచుకుంటూ వెళ్తున్నాడు. నిర్మానుష్యంగా ఉన్న ఆ వీధిలోకి ఎక్కడి నుంచో హఠాత్తుగా నలుగురు కుర్రాళ్లు వచ్చారు. వాళ్లలో వాళ్లు గొడవపడి హఠాత్తుగా వాళ్లలో ఒకర్ని కత్తితో పొడిచేశారు. ఇది చూసి కంగారుపడిన పెద్దాయన కూరగాయల సంచి వదిలేసి అటు నుంచి అటే వెనక్కి పరుగుతీశాడు. ఇదంతా దూరంగా ఓ కెమెరా షూటింగ్ చేస్తోంది. అంటే ఇదేదో సినిమా షూటింగ్ అనుకునేరు. కానేకాదు ‘ప్రాంక్’ల పేరుతో ఈ మధ్య కాలంలో ఎక్కువగా జరుగుతున్న తతంగం.
సరదా మాటలు, నవ్వించే రాతలు, గీతలు, చిలిపి చేష్టలు.. చక్కటి హాస్యానికి చిరునామాలు. వీటిలో ఏ ఒక్కటి గతి తప్పినా అపహాస్యమే. జోక్స్ వేయడం, నవ్వించేలా కార్టూన్స్/క్యారికేచర్స్ గీయడం అంత ఈజీ కాదు. ఇక చిలిపి చేష్టల విషయంలో ఎంత జాగ్రత్తగా ఉంటే అంత మంచిది. లేకపోతే పరిస్థితులు గందరగోళంగా తయారవుతాయి. కాలం మారింది. టెక్నాలజీ తోడయ్యాక తిట్లు/బూతులు, శరీరాన్ని లక్ష్యంగా చేసుకొని హాస్యం వెగటు పుట్టించేలా తయారైంది. ఇందులో ‘ప్రాంక్’ పేరుతో జరిగేవి మనుషుల్ని ఇబ్బంది పెట్టేవిగా ఉంటున్నాయి. అయితే వీటినీ ఎంజాయ్ చేస్తున్నవాళ్లూ ఉన్నారు. అందుకే ప్రపంచమంతా ప్రాంక్ల గోల తారస్థాయికి చేరింది. కొన్ని దేశాల్లో ఏకంగా ‘ప్రాంక్’ వీడియోలు సీరియల్స్, సిరీస్లుగా టీవీలు, యూట్యూబ్ల్లో కూడా టెలికాస్ట్ అవుతున్నాయి. మనదేశంలో టీవీల వరకూ చేరనప్పటికీ యూట్యూబ్లో ప్రాంక్ వీడియోలు ఎక్కువగానే ఉన్నాయి. వస్తున్నాయి కూడా. ఈ మధ్య ప్రాంక్ వీడియోలపైన వివాదాలు మరీ ఎక్కువయ్యాయి. టీవీ ఛానెళ్లలో కూడా వీటిపై డిబేట్లు జరిగాయి. ఓ సినిమా ప్రమోషన్లో భాగంగా హీరో విశ్వక్సేన్ ప్రాంక్ చేయడంతో... దానిమీద కేసు కూడా నమోదైంది. ఆ తర్వాత... ప్రాంక్ వీడియోలు చేసే శ్రీకాంత్ అనే యూట్యూబర్ని నటి కరాటె కళ్యాణి కొట్టిన వివాదం పోలీస్స్టేషన్లో కేసుల వరకు వెళ్లింది. ఇవే కాదు.. ఇదివరకు కూడా ఇలా బోల్తా కొట్టిన ప్రాంక్ వీడియోలు బోలెడు ఉన్నాయి.
జకాస్తో మొదలై...
ప్రాంక్ వీడియోలను మొదట తెచ్చింది జకాస్. ఇది అమెరికాలో రియాలిటీ కామెడీ షో. దీని రూపకర్తలు జెఫ్ ట్రెమైన్, స్పైక్ జాంజ్, జానీ నాక్స్విల్లీ. అక్టోబర్ 2000 నుంచి ఆగస్టు 2001 మధ్య మూడు సీజన్లలో ఈ షో టీవీలో ప్రసారమైంది. ఇందులో తొమ్మిది మంది ప్రధాన పాత్రధారులు ఉండేవాళ్లు. వీళ్లంతా ఒకళ్ల మీద మరొకరు లేదా జనాల మధ్యలో కొన్ని రకాల స్టంట్లు, ప్రాంక్లు చేసేవాళ్లు. అయితే, సమాజంలో అసభ్యత, ప్రమాదకర ప్రవర్తన ప్రేరేపించేలా ఈ షో ఉందని విమర్శలు రావడంతో 2002లో టెలికాస్ట్ చేయడం ఆపేశారు.
యూట్యూబ్ అందుకుంది
విమర్శలతో జకాస్ ఆగిపోయిన చాలా ఏండ్లకు జెస్సీ వెల్లెన్స్ తన గర్ల్ఫ్రెండ్ జియానా స్మిత్తో కలసి ‘ప్రాంక్’ వీడియోలను మళ్ళీ మొదలుపెట్టాడు. వీళ్లిద్దరూ వాళ్లలో వాళ్లే తగవుపడుతున్నట్లు, ప్రమాదకర పందాలు వేసుకుంటున్నట్లు.. రకరకాల వీడియోలు నిజమని నమ్మేలా తీసి వెబ్సైట్లలో పెట్టడం మొదలుపెట్టారు. ఆ తర్వాత ప్రాంక్ వర్సెస్ ప్రాంక్ పేరుతో యూట్యూబ్లో ఛానెల్ క్రియేట్ చేశారు. అందులో వీడియోలు ఉంచేవాళ్లు. వీటిని చూసే వాళ్ల సంఖ్య బాగా ఉండడంతో వెల్లెన్స్, స్మిత్ను యూట్యూబ్ కాంటాక్ట్ చేసింది. వాళ్లతో కలసి ‘ప్రాంక్ అకాడమీ’ ద్వారా కొన్ని ప్రాంక్ వీడియోలు చేసింది. ఓ వ్లాగర్ వంట చేస్తుండగా మంటలు చెలరేగి అక్కడి ఓ మహిళా సిబ్బందికి అంటుకోవడాన్ని మొదటి ఎపిసోడ్గా చేసింది. ఈ వీడియోను లక్షల మంది చూశారు. అదే టైమ్లో అట్వుడ్, రోడీ, విటలీ బృందం భయంకరమైన ప్రాంక్ వీడియోలు తీసింది. ‘నేచురల్ బోర్న్ ప్రాంక్స్టర్స్’ పేరుతో వీళ్లు చేసిన వీడియోలు భయంకరంగా ఉన్నాయని అమెరికాలో న్యూస్ పేపర్స్ మొదటి పేజీ వార్తలుగా వేశాయి. ముఖ్యంగా అట్వుడ్.. భార్య ఎదురుగానే కుమారుడిని చంపుతున్నట్లు తీసిన వీడియో తీవ్ర విమర్శల పాలైంది. అయినప్పటికీ అట్వుడ్ ప్రాంక్లు తీయడం ఆపలేదు. అయితే, 2019 నుంచి అతని ఛానెల్లో వీడియోలు రావడం ఆగిపోయాయి. ఎదుటివారి భయం, అమాయకత్వం, ఇబ్బంది వంటి వాటిని ఆసరాగా చేసుకొని ప్రాంక్ల పేరుతో వీడియోలు తీయడం మంచిది కాదు. ఏ రకంగానూ ఇబ్బంది పెట్టని మాటలు, చేతలతో నవ్వించినప్పుడే హాస్యం అపహాస్యం కాకుండా ఉంటుంది.
వివాదాస్పదం సామ్ పెప్పర్
ప్రాంక్ల చరిత్రలోనే అత్యంత వివాదాస్పదమైనవి సామ్ పెప్పర్ తీసిన వీడియోలు. ఇంగ్లాండ్కు చెందిన పెప్పర్ ప్రాంక్ వీడియోలు తీయడంలో దిట్ట. ప్రాంక్స్టర్గా, టిక్టాకర్గా చాలా ఫేమస్. 2010లో యూబ్యూబ్లో సొంత ఛానెల్ ప్రారంభించాడు. దీనికి సుమారు 20లక్షలకు పైగా సబ్స్ర్కైబర్లు ఉన్నారు. ఈ ఛానెల్లో సామ్ ఉంచిన ప్రాంక్ వీడియోల్లో రెండు తీవ్ర దుమారం సృష్టించాయి. వాటిలో మొదటిది.. రోడ్డు మీద వెళ్తున్న మహిళలు, అమ్మాయిల వెనక భాగంపై తట్టి.. తాను వెళ్లాల్సిన రూట్ అడుగుతూ చేసిన ‘‘ఫేక్ హ్యాండ్ యాస్ పించ్ ప్రాంక్’’. రెండోది.. ఒక స్నేహితుడిని మరొక స్నేహితుడి ఎదురుగా తుపాకీతో కాల్చి చంపుతున్నట్లు తీసిన ‘‘కిల్లింగ్ బెస్ట్ ఫ్రెండ్ ప్రాంక్’’. మొదటి వీడియో మహిళలను లైంగిక హింసకు గురిచేస్తున్నట్లు ఉంది. దాన్ని వెంటనే యూట్యూబ్ నుంచి తీసేసి, సామ్ను శిక్షించాలంటూ లక్షకు పైగా సంతకాలు సేకరించి మరీ ఫిర్యాదు చేశారు. అయితే, మొదట ఈ రెండు వీడియోల్లో తప్పేంలేదని మాట్లాడిన సామ్.. ఆ తర్వాత వాటిని యూట్యూబ్ నుంచి తొలగించాడు. అంతేకాదు, క్షమాపణలు చెప్తూ మరో వీడియోను యూట్యూబ్లో ఉంచాడు.