హైదరాబాద్, వెలుగు: గృహలక్ష్మి స్కీమ్ అప్లికేషన్ల విషయంలో ఆందోళన చెందాల్సిన అవసరం లేదని, ఇది నిరంతర ప్రక్రియ అని మంత్రి వేముల ప్రశాంత్ రెడ్డి అన్నారు. గ్రామ పరిధిలో పాత ఇల్లు ఉన్నా, స్థలం ఉన్నా దరఖాస్తు చేసుకోవచ్చని చెప్పారు. ఈ మేరకు బుధవారం ఒక ప్రకటన రిలీజ్ చేశారు. ప్రజలు తమ అప్లికేషన్లను ఎమ్మెల్యేలకు, కలెక్టర్లకు ఇవ్వొచ్చని మంత్రి సూచించారు. మొదటి దశలో ప్రతి నియోజకవర్గానికి మూడు వేల ఇండ్లు ఇస్తున్నామని, అవి పూర్తయిన వెంటనే రెండో దశ గృహలక్ష్మి స్కీమ్ కోసం దరఖాస్తులు తీసుకుంటారన్నారు. అర్హులైన పేదలందరికీ దశలవారీగా గృహలక్ష్మి స్కీమ్ అందుతుందని స్పష్టం చేశారు. ఈ పథకం అప్లికేషన్ల గడువు ముగుస్తుందంటూ మీడియాలో వస్తున్న వార్తలను నమ్మొద్దని సూచించారు.
