- డబ్ల్యూహెచ్వో దర్యాప్తుకు ఒప్పుకోబోమన్న చైనా
బీజింగ్: కరోనా పుట్టుకపై దర్యాప్తు చేయాలన్న ప్రపంచ ఆరోగ్య సంస్థ (డబ్ల్యూహెచ్వో) నిర్ణయంపై చైనా అసహనం వ్యక్తం చేసింది. వైరస్ ల్యాబ్ నుంచి లీకైందన్న దానికి ఆధారాలే లేవని తేల్చి చెప్పింది. దానిపై మరోసారి దర్యాప్తు చేసేందుకు ఒప్పుకోబోమని స్పష్టం చేసింది. ఈ విషయంపై గురువారం చైనా అధికారులు మీడియాతో మాట్లాడారు. జంతువుల నుంచి మనుషులకు వ్యాపించిందని నేషనల్ హెల్త్ కమిషన్ వైస్మినిస్టర్ జెంగ్ యిషిన్ చెప్పారు. వైరస్పై ప్రయోగాలు చేస్తుండగా కొందరు సైంటిస్టులకు వైరస్ సోకిందన్న ఆరోపణలను ఆయన ఖండించారు. వుహాన్లోని ల్యాబ్ నుంచే కరోనా వైరస్ లీకైందని ఎప్పటి నుంచో అమెరికా సహా కొన్ని దేశాల సైంటిస్టులు, నిపుణులు చెప్తున్న సంగతి తెలిసిందే. దీనిపై కొద్దినెలల క్రితం డబ్ల్యూహెచ్వో నిపుణులు చైనా వెళ్లి దర్యాప్తు చేశారు కూడా. తాజాగా దానిపై మరోసారి దర్యాప్తుకు డబ్ల్యూహెచ్వో నిర్ణయం తీసుకుంది. దీనిపై మండిపడిన జెంగ్.. అసలు వుహాన్ ల్యాబ్లో కరోనా వైరస్సే లేదని అన్నారు. ల్యాబ్ నుంచి లీకైందన్న విషయాన్ని తేల్చడం కోసం నిర్ణయించిన దర్యాప్తుపై మరిన్ని వనరులను పెట్టేందుకు తాము సిద్ధంగా లేమని తేల్చి చెప్పారు. కరోనా ఎలా పుట్టిందన్న దానిపై స్టడీలు జరగాల్సిందేనని, రాజకీయ దురుద్దేశాలతోనే మళ్లీ ల్యాబ్ లీక్ థియరీలపై రెండో దశ దర్యాప్తు జరిపేందుకు సిద్ధమైందని విమర్శించారు. దానికి సహకరించబోమని అన్నారు.
ఫ్రాన్స్లో నాలుగో వేవ్
ఫ్రాన్స్లో కరోనా నాలుగో వేవ్ మొదలైపోయింది. ఇప్పటికే అన్నింటినీ ఓపెన్ చేసేయడంతో కేసులు విపరీతంగా పెరిగిపోతున్నాయి. దీంతో వేరే దేశాల నుంచి వచ్చే వారికి ‘వ్యాక్సిన్ సర్టిఫికెట్’లను ఆ దేశ ప్రభుత్వం తప్పనిసరి చేసింది. సినిమాలు, షికార్లు, మ్యూజియాలు, స్టేడియాలకు వెళ్లే వారు కచ్చితంగా కరోనా నెగెటివ్ సర్టిఫికెట్ను ఇవ్వాల్సి ఉంటుందని స్పష్టం చేసింది. దానికి ఫ్రాన్స్ ‘హెల్త్ పాస్’ అని పిలుస్తోంది. కాఫీ షాపులు, రెస్టారెంట్లు, షాపింగ్ మాళ్లకు వెళ్లానుకున్నా హెల్త్పాస్ ఉండాల్సిందేనని తేల్చి చెప్పింది. ఇక, ఐఫిల్ టవర్, ద లూవర్ మ్యూజియం వంటి పర్యాటక ప్రాంతాల్లో వ్యాక్సిన్ సర్టిఫికెట్లను పరిశీలించాకే లోపలికి అనుమతిస్తున్నారు. మాస్కులను తప్పనిసరి చేశారు. దీనిపై ప్రతిపక్షాలు విమర్శలు గుప్పించాయి. హెల్త్పాస్లు, వ్యాక్సిన్ సర్టిఫికెట్లంటే హక్కుల ఉల్లంఘనేనని మండిపడుతున్నాయి. కాగా, అమెరికాలో నమోదవుతున్న కరోనా కేసుల్లో 83 % డెల్టా వేరియంట్లేనని సెంటర్ ఫర్ డిసీజ్ కంట్రోల్ అండ్ ప్రివెన్షన్ (సీడీసీ) వెల్లడించింది.