Ram Charan : అమ్మమ్మ ఆఖరి ప్రయాణంలో కన్నీటి పర్యంతమైన రామ్ చరణ్

Ram Charan :  అమ్మమ్మ ఆఖరి ప్రయాణంలో కన్నీటి పర్యంతమైన రామ్ చరణ్

ప్రముఖ సినీ నిర్మాత అల్లు అరవింద్ తల్లి, దివంగత హాస్య నటుడు అల్లు రామలింగయ్య సతీమణి అల్లు కనకరత్నమ్మ (94) మరణంతో అల్లు, కొణిదెల కుటుంబాల్లో తీవ్ర విషాదం అలుముకుంది. వృద్ధాప్య సమస్యలతో బాధపడుతున్న ఆమె శుక్రవారం అర్థరాత్రి తుదిశ్వాస విడిచారు. శనివారం కోకాపేటలోని ఫామ్‌హౌస్‌లో అంత్యక్రియలు నిర్వహించారు.

కనకరత్నమ్మ మృతి పట్ల మెగాస్టార్ చిరంజీవి తీవ్ర దిగ్భ్రాంతి వ్యక్తం చేశారు. చిరంజీవి సతీమణి సురేఖకు కనకరత్నమ్మ స్వయానా తల్లి కావడంతో ఇది చిరంజీవి కుటుంబానికి తీరని లోటు. తన అత్తగారి మరణంపై చిరంజీవి ఎమోషనల్ పోస్ట్ చేశారు. "మా అత్తయ్య గారు కీ.శే అల్లు రామలింగయ్య గారి సతీమణి కనకరత్నమ్మ గారు శివైక్యం చెందటం ఎంతో బాధాకరం. మా కుటుంబాలకు ఆమె చూపిన ప్రేమ, ధైర్యం, జీవిత విలువలు ఎప్పటికీ మాకు ఆదర్శం. వారి పవిత్ర ఆత్మకు శాంతి చేకూరాలని దేవుడిని ప్రార్థిస్తున్నాను. ఓం శాంతిః" అని ట్వీట్ చేశారు.

తన నానమ్మ కనకరత్నమ్మ మరణ వార్త తెలియగానే ముంబైలో షూటింగ్‌లో ఉన్న అల్లు అర్జున్ హుటాహుటిన హైదరాబాద్ వచ్చారు. నానమ్మ పార్థివదేహానికి నివాళులర్పించి భావోద్వేగానికి గురయ్యారు. గతంలో, 'పుష్ప' సినిమా షూటింగ్‌ పూర్తయిన తర్వాత జైలు సన్నివేశం నుంచి బయటపడినప్పుడు, అల్లు అర్జున్‌కు నానమ్మే స్వయంగా దిష్టి తీశారు. ఆ సమయంలో ఆమె కాళ్లకు నమస్కరించి ఆశీర్వాదం తీసుకున్నారు. 

ALSO READ : ఆశీర్వాదం తీసుకున్న చేతులతో..

తన అమ్మమ్మ మృతి వార్త తెలియగానే రామ్ చరణ్ మైసూరులో జరుగుతున్న తన సినిమా షూటింగ్‌ను మధ్యలో ఆపేసి హుటాహుటిన హైదరాబాద్ చేరుకున్నారు. అమ్మమ్మ మృతదేహాన్ని చూసి కన్నీరు పెట్టుకున్నారు. మేనమామ అల్లు అరవింద్‌, అల్లు అర్జున్‌ రామ్ చరణ్ ను ఓదార్చారు. 

అంత్యక్రియల ఏర్పాట్లను అల్లు అరవింద్‌, చిరంజీవి దగ్గరుండి చూసుకున్నారు. పవన్ కళ్యాణ్ సతీమణి అన్నా లెజినోవా, దిల్ రాజు, బోయపాటి శ్రీను, దగ్గుబాటి వెంకటేష్,  నాగచైతన్య, వరుణ్ తేజ్, సాయి ధరమ్ తేజ్, త్రివిక్రమ్, బన్నీ వాసు, ఘట్టమనేని శేషగిరిరావు వంటి పలువురు సినీ, రాజకీయ ప్రముఖులు కనకరత్నమ్మ పార్థివదేహానికి నివాళులర్పించారు. అల్లు కుటుంబానికి తమ ప్రగాఢ సానుభూతిని తెలిపారు. ఆమె మృతి తెలుగు సినీ పరిశ్రమలో విషాదఛాయలు నింపింది. ఈ విషాద సమయంలో అల్లు కుటుంబం తమ నష్టాన్ని భరించే శక్తిని పొందాలని అభిమానులు ప్రార్థిస్తున్నారు.