- ఉద్యోగుల పనితీరుపై నిఘా పెట్టే ఆర్టిఫిషియల్ ఇంటెలిజెన్స్
- వాడుతున్న కస్టమర్ కేర్ ,ఇన్సూరెన్స్ కంపెనీలు
- అమెజాన్ , ఐబీఎం వంటి కంపెనీల్లోనూ సొంత ఏఐ
- ఎప్పటికప్పుడు ఉద్యోగుల పనిపై రివ్యూలు
మేనేజరో లేదంటే డిపార్ట్మెంట్ ఇన్చార్జ్కో ఏదైనా కంపెనీ ఉద్యోగులు రిపోర్ట్ చేస్తూ ఉంటారు. ప్రతి ఉద్యోగికి సంబంధించిన చిట్టా ఆ ఇన్చార్జ్ చేతిలో ఉంటుంది. ఉద్యోగి పెర్ఫార్మెన్స్, యాటిట్యూడ్ తదితర వ్యవహారాలన్నింటిపైనా ఓ కన్నేసి ఉంచుతుంటారు. కానీ, ఆ పనులన్నీ ‘బాస్’లా ఆర్టిఫిషియల్ ఇంటెలిజెన్స్ (ఏఐ– కృత్రిమ మేధ) చేస్తే ఎలా ఉంటుంది? ఇప్పటిదాకా ఉద్యోగులను ఏఐ రీప్లేస్ చేసేస్తోందన్న వార్తలను చదివే ఉంటాం కదా. కానీ, కొన్ని కంపెనీలు ఏఐకి నేరుగా బాస్ స్థానాన్నే కట్టబెట్టేస్తున్నాయి. అమెరికాలోని బోస్టన్కు చెందిన కాగిటో అనే ఏఐ సంస్థ అందుకు ఓ సాఫ్ట్వేర్ను తయారు చేసింది. ఆ సాఫ్ట్వేరే ఉద్యోగుల పనితనాన్ని అంచనా వేస్తుంది. వాళ్ల పనిని అడుగడుగునా కాచుకుంటుంది. మాట్లాడే పద్ధతి, పనిలో ఉత్సాహం, గొంతులో సానుభూతి వంటి విషయాలను పసిగడుతుంది. తర్వాత వాళ్ల పనితీరుకు హార్ట్, కాఫీ కప్ వంటి గుర్తులతో రియల్టైంలో మార్కులిస్తుంది. ప్రస్తుతం కొన్ని కస్టమర్ కేర్ కంపెనీలు, ఇన్సూరెన్స్ సంస్థలు ‘ఏఐ బాస్’లను నియమించుకుంటున్నాయి. దాదాపు 20 వేల మంది యూజర్లు తమ ఏఐ బాస్ను నియమించుకున్నట్టు కాగిటో పేర్కొంది. మెట్లైఫ్, హ్యుమానా వంటి హెల్త్ ఇన్సూరెన్స్ కంపెనీలు ఆ సేవలు వినియోగించుకుంటున్నాయి. ఏఐ బాస్ను పెట్టుకున్న తర్వాత కస్టమర్లను సంతృప్తి పరచడంలో 13 శాతం పెరుగుదల నమోదైందట.
అణువణువూ నిఘా
ఏఐ బాస్ ప్రధాన ఉద్దేశం ఉద్యోగుల పనితీరును పెంచడమేనని కాగిటో సీఈవో జోషువా ఫీస్ట్ చెబుతున్నారు. ఇప్పటికే చాలా కస్టమర్ కేర్ కంపెనీలు ఈ కాగిటో ఏఐని వాడుతున్నాయి. ఉదాహరణకు, ఓ ఉద్యోగి కస్టమర్తో ఫోన్లో మాట్లాడేటప్పుడు, అతడి కంప్యూటర్కింద చిన్న బాక్స్ కనిపిస్తుంది. అక్కడ అతడి మాటతీరుపై రిమార్క్స్ ఇస్తుంటుంది ఏఐ. ఒకవేళ అతడు స్పీడ్గా మాట్లాడుతున్నాడంటే.. వెంటనే అలర్ట్ చేస్తుంది. మాటల్లో ఇంకాస్త ఎనర్జీ కావాలంటే ‘కాఫీ’ కప్పును అక్కడ చూపిస్తుంది. మాటతీరు బాగాలేకుంటే ‘హార్ట్’ సింబల్ను ఇస్తుంది.
అమెజాన్ ఉద్యోగులనూ తీసేసింది
అమెజాన్ కూడా ఉద్యోగుల పనితీరును పరిశీలించేందుకు ఏఐని పెట్టింది. కానీ, అది చాలా సంక్లిష్టంగా ఉంటుందని నిపుణులు చెబుతున్నారు. ఫుల్ఫిల్మెంట్ సెంటర్లలో పనిచేసే ఉద్యోగుల పనితీరును బేరీజు వేసేందుకు అమెజాన్ ఏఐని వాడుతున్నట్టు ఈ ఏడాది మొదట్లో ద వెర్జ్ అనే వార్తా పత్రిక వెల్లడించింది. బాగా పనిచేయని వాళ్లను, టార్గెట్స్ను చేరుకోని వాళ్లను ఉద్యోగం నుంచి తీసేసేందుకు ఆ ఏఐ పేపర్వర్క్ తయారు చేసేదట. ఐబీఎం కూడా వాట్సన్ అనే సొంత ఏఐ ప్లాట్ఫాంను వాడుతోంది. ఉద్యోగుల పనితీరు భవిష్యత్తులో ఎట్ల ఉంటుందన్న దానిపై రివ్యూలు చేస్తోంది. దాని వల్ల 96 శాతం ఫలితాలు కచ్చితత్వంతో వస్తున్నాయని కంపెనీ చెబుతోంది. ఇక, చాలా స్టార్టప్ కంపెనీలు కాగిటో ఏఐని వాడుతున్నాయి. ఇటీవలే ఊబెర్, లిఫ్ట్ వంటి కంపెనీలు, షెడ్యూలింగ్, పేరోల్, పెర్ఫార్మెన్స్ రివ్యూలపై ఇలాంటి ఏఐ బాస్‌‌లతోనే విదేశాలకు సేవలందించాయి.
ఉద్యోగాలు పోతయ్
నిజానికి ఇలా ఉద్యోగులను మానిటర్ చేయడానికి ఏఐ వాడడం ఇది కొత్తేం కాదు. 20వ శతాబ్దం ప్రారంభంలోనే ఫ్రెడరిక్ విన్స్లో టేలర్ అనే వ్యక్తి ఈ ఏఐ సిద్ధాంతాన్ని ప్రపంచానికి పరిచయం చేశారు. ఏఐని బాస్ల స్థానంలోకి తీసుకురావడంపై విమర్శలు వెల్లువెత్తుతున్నాయి. ఇప్పటికే ఆటేమేషన్ వల్ల చాలా ఉద్యోగాలు పోయాయని, మళ్లీ వీటిని కూడా తీసుకొస్తే మరిన్ని ఉద్యోగాలు పోతాయని ఆందోళన వ్యక్తం చేస్తున్నారు. అయితే, సంస్థలు మాత్రం దీని వల్ల ఉద్యోగుల పనితీరు మెరుగవుతుందని చెబుతున్నాయి. 1500 మంది పనిచేస్తున్న తమ కాల్సెంటర్లో మెట్లైఫ్ కాగిటో ఏఐని పెట్టింది. నేరుగా తాను ఉద్యోగుల పనితీరును రివ్యూ చేయడం కన్నా, ఇలా ఏఐతో రివ్యూ చేయించడాన్ని చాలా మంది ఉద్యోగులు స్వాగతించారని మెట్లైఫ్ గ్లోబల్ ఆపరేషన్స్ హెడ్ క్రిస్టోఫర్ స్మిత్ చెప్పారు. మనుషులతో అది మమేకమవుతోందన్నారు. అమెరికాకు చెందిన ఆల్టర్టిల్స్, పైమెట్రిక్ తదితర స్టార్టప్ లతో పాటు పోస్ట్మేట్స్, డోర్డాష్ వంటి డెలివరీ సంస్థలూ ఈ ఏఐ బాస్ను వాడుతున్నాయి. మనుషులు చేసే తప్పులను సరిదిద్దడానికి ఏఐ కరెక్ట్ సాధనమని కొందరు నిపుణులు చెబుతున్నారు.
