- తెలుగులో ‘స్వరాజ్’ సీరియల్
- రేపటి నుంచి డీడీ యాదగిరి చానెల్ లో ప్రసారం
పద్మారావునగర్, వెలుగు: ఆజాదీకా అమృత్ మహోత్సవ్లో భాగంగా కేంద్ర సమాచార -ప్రసార మంత్రిత్వ శాఖ వివిధ కార్యక్రమాలు చేపట్టింది. ఇందులో భాగంగా స్వరాజ్య సముపార్జన దిశగా దేశం సాగించిన పయనాన్ని ప్రముఖంగా ప్రదర్శిస్తూ ‘స్వరాజ్:- భారత్ కే స్వతంత్రత సంగ్రామ్ కీ సమగ్ర గాథ’ అనే మెగా సీరియల్ను దూరదర్శన్ నిర్మించింది. ఈ సీరియల్20వ తేదీ నుంచి ‘డీడీ యాదగిరి’ చానెల్ లో తెలుగులో ప్రసారం చేయనున్నట్లు దూరదర్శన్ హైదరాబాద్ కేంద్రం డిప్యూటీ డైరెక్టర్ జనరల్ ఎన్వీ రమణ, డిప్యూటీ డైరెక్టర్ సురేఖ వెల్లడించారు.
గురువారం కవాడిగూడ సీజీవో టవర్స్లో ప్రెస్ఇన్ ఫర్మేషన్ బ్యూరో ఆధ్వర్యంలో ఏర్పాటు చేసిన మీడియా సమావేశంలో వారు మాట్లాడారు. ప్రతి శనివారం రాత్రి 8 గంటలకు ఈ సీరియల్ ప్రసారమవుతుందన్నారు. అలాగే ఆదివారం రాత్రి 9.30 గంటలకు, బుధ, శుక్రవారాల్లో ఉదయం 11 గంటలకు మళ్లీ ప్రసారం అవుతుందని చెప్పారు. 75 ఎపిసోడ్ల ఈ సీరియల్ను ప్రజలు తప్పనిసరిగా చూడాలని సూచించారు.
ప్రధాని నరేంద్ర మోడీ సీరియల్ మొదటి ఎపిసోడ్ను ఇటీవలే కేంద్ర మంత్రులతో కలసి న్యూఢిల్లీలో చూశారని తెలిపారు. సమావేశంలో పీఐబీ- సీబీసీ డైరెక్టర్ శృతి పాటిల్, దూరదర్శన్ కేంద్రం ప్రోగ్రామింగ్ ఎగ్జిక్యూటివ్ కె.కామేశ్వరి, పీఐబీ మీడియా, కమ్యూనికేషన్ ఆఫీసర్ వర్గంటి గాయత్రి తదితరులు పాల్గొన్నారు.
