డిఫరెంట్ మేకింగ్ స్టైల్తో తనకంటూ ప్రత్యేక గుర్తింపు తెచ్చుకున్న యువ దర్శకుడు కిరణ్ కుమార్ (KK). 2025 డిసెంబర్ 17న డైరెక్టర్ కిరణ్ కన్నుమూశారు. ఈ టాలెంటెడ్ డైరెక్టర్ తెరకెక్కించిన చివరి మూవీ ‘KJQ: కింగ్.. జాకీ.. క్వీన్’. ఈ మూవీ ఇవాళ (ఆగస్టు 7, 2026న) థియేటర్లలో విడుదలైంది. పీరియాడిక్ బ్యాక్డ్రాప్లో సాగే ఈ గ్యాంగ్స్టర్ డ్రామాను.. యాక్షన్, భావోద్వేగాలతో కిరణ్ రూపొందించారు.
ఇందులో ‘దసరా’ చిత్రంతో గుర్తింపు పొందిన దీక్షిత్ శెట్టి, శశి ఓదెల, యుక్తి తరేజా లీడ్ రోల్స్లో నటించారు. SLV సినిమాస్ బ్యానర్పై సుధాకర్ చెరుకూరి నిర్మించారు. డైరెక్టర్ KKకు సినిమాపై ఉన్న ప్యాషన్, విజన్కి నివాళిగా ఈ చిత్రాన్ని పూర్తిచేసి ప్రేక్షకుల ముందుకు తీసుకొచ్చారు. భారీ అంచనాలతో వచ్చిన KJQ ఎలా ఉంది? డైరెక్టర్ KK ఎలాంటి థ్రిల్లింగ్ అంశాలతో ఆడియన్స్ను అలరించాడు? అనేది రివ్యూలో చూద్దాం.
కథేంటంటే:
పేదరికంలో పెరిగిన పార్థ (దీక్షిత్ శెట్టి)కి అధికారం, డబ్బే జీవితంలో అత్యంత ముఖ్యమనే నమ్మకం ఉంటుంది. ఆ లక్ష్యాన్ని చేరుకోవడానికి హింసనే ఆయుధంగా ఎంచుకున్న అతడు, క్రమంగా అండర్వరల్డ్లో తనకంటూ ఓ సామ్రాజ్యాన్ని నిర్మించుకుంటాడు. అతడి అత్యంత సన్నిహితుడు జాకీ (శశి ఓదెల) కూడా అదే ప్రపంచంలో జీవిస్తున్నప్పటికీ, లోలోపల మాత్రం ప్రశాంతమైన సాధారణ జీవితాన్ని గడపాలనే కోరికతో ఉంటాడు.
ఇలాంటి సమయంలో గతంలోని చేదు జ్ఞాపకాలతో బాధపడుతున్న ధైర్యవంతురాలు భార్గవి (యుక్తి తరేజా) వారి జీవితాల్లోకి ప్రవేశిస్తుంది. తొలిచూపులోనే భార్గవిపై మనసుపడిన పార్థ, ఆమెను ఎలాగైనా తన జీవిత భాగస్వామిని చేసుకోవాలని నిర్ణయించుకుంటాడు. అయితే, తన గత అనుభవాల కారణంగా భార్గవి అతడిని పూర్తిగా దూరం పెడుతుంది.
ఈ నేపథ్యంలో చోటుచేసుకునే ఒక అనూహ్య సంఘటన పార్థ, జాకీ, భార్గవి జీవితాలను ఊహించని మలుపు తిప్పుతుంది. ఆ సంఘటన ఏమిటి? భార్గవి గతం ఏమిటి? పార్థ ప్రేమను ఆమె ఎందుకు తిరస్కరించింది? స్నేహం, ప్రేమ, అధికారం, ద్రోహం మధ్య ఈ ముగ్గురి జీవితాలు చివరకు ఎలాంటి గమ్యానికి చేరుకున్నాయి? అనేదే 'KJQ: కింగ్.. జాకీ.. క్వీన్' సినిమా కథ.
ALSO READ : ఓటీటీలో ట్రెండ్ సెట్ చేస్తున్న ‘లెనిన్’..
ఎలా ఉందంటే?
1990 బ్యాక్డ్రాప్లో సాగే కథగా మూవీని ఇంట్రెస్టింగ్ గా తెరకెక్కించారు కిరణ్. దావూద్ ఇబ్రహీం, అజ్మల్ కసబ్, మదర్ థెరిసా వంటి వ్యక్తుల ఉదాహరణలతో.. పరిస్థితులే ఒక మనిషిని విలన్గా, మహాత్ముడిగా లేదా సాధారణ వ్యక్తిగా మలుస్తాయనే భావనను బలంగా చెప్పుకొచ్చాడు. అదే ఆలోచన చుట్టూ తిరిగే ముగ్గురు ప్రధాన పాత్రల ప్రయాణాన్ని ఇందులో కళ్ళకు కట్టినట్లుగా చూపించారు. స్నేహం, అధికారం, అహంకారం, ద్రోహం, ప్రతీకారం.. ఈ ఐదు భావోద్వేగాల చుట్టూ సినిమా నడిపించడంలో డైరెక్టర్ KK సక్సెస్ అయ్యారు. మొత్తంగా ఉత్కంఠభరితమైన కథనం, ఇంటెన్స్ ఎమోషన్స్, ఊహించని మలుపులు, హై-వోల్టేజ్ యాక్షన్తో దర్శకుడు KK ప్రేక్షకులని మెప్పించాడు.
దీక్షిత్ శెట్టి తన ఇంటెన్స్ స్క్రీన్ ప్రెజెన్స్తో ఆకట్టుకోగా, శశి ఓదెల, యుక్తి తరేజా పాత్రలు కథలో కీలక మలుపులకు కారణమయ్యేలా కనిపిస్తూ ఆసక్తిని పెంచారు. అయితే, ఫస్టాఫ్లో కొన్నిచోట్ల కథ నెమ్మదిస్తుంది. అయినప్పటికీ కథలో ఇంటెన్స్ ఉండటంతో ఇంటర్వెల్ బ్యాంగ్ అదిరిపోతుంది. సెకండాఫ్లో పరిస్థితులే మనుషులను మంచివారిగా లేదా చెడ్డవారిగా తీర్చిదిద్దుతాయనే ఆసక్తికరమైన ఆలోచన ఆడియన్స్ ను ఎంగేజ్ చేస్తుం
టెక్నీకల్ అంశాలు..
డైరెక్టర్ కిరణ్ కుమార్ (KK) తన క్రేజీ విజన్తో మరోసారి మెప్పించాడు. కొన్ని సన్నివేశాల్లో ఆయన మేకింగ్ స్టైల్, విజువల్ ట్రీట్ ప్రత్యేకంగా నిలుస్తాయి. నాగేష్ బానెల్ సినిమాటోగ్రఫీ, పూర్ణచంద్ర తేజస్వి సంగీతం, సౌమిత్ దేశ్ముఖ్ సౌండ్ డిజైన్ సినిమాకు ప్రధాన బలాలుగా నిలిచాయి. అయితే ఎడిటింగ్ ఇంకాస్త క్రిస్పీగా ఉంటే అదిరిపోయేది. SLV సినిమాస్ నిర్మాణ విలువలు మాత్రం మంచి స్థాయిలో ఉన్నాయి.
