- చైనాను ఎదిరించే పార్టీకి పట్టం కట్టిన ప్రజలు
- తైవాన్పై చైనా ఒత్తిళ్లు పెరగొచ్చంటున్న నిపుణులు
తైపీ: తైవాన్ కొత్త ప్రెసిడెంట్గా లై చింగ్ తే ఎన్నికయ్యారు. శనివారం జరిగిన అధ్యక్ష, పార్లమెంటు ఎన్నికల్లో అధికార డెమోక్రటిక్ ప్రోగ్రెసివ్ పార్టీ(డీపీపీ)కి చెందిన ఆయనకు తైవాన్ ప్రజలు పట్టం కట్టారు. ప్రస్తుత తైవాన్ అధ్యక్షురాలు త్సయి ఇంగ్-వెన్ స్థానంలో త్వరలో ఆయన బాధ్యతలు చేపడతారు. గతంలో వరుసగా రెండు సార్లు ఆమె ప్రెసిడెంట్గా ఎన్నికయ్యారు. ఆ దేశ రాజ్యాంగం ప్రకారం మరోసారి పోటీ చేసేందుకు అవకాశం లేకపోవడంతో తన రాజకీయ వారసుడిగా లై చింగ్ను ప్రకటించారు. లై చింగ్ గెలుపుతో తైవాన్ చిరకాల ప్రత్యర్థి చైనాకు గట్టి ఎదురుదెబ్బ తగిలినట్టయింది. వేర్పాటు వాది, సమస్యలు సృష్టిస్తాడని.. లైచింగ్ను ఎన్నుకోవద్దని ప్రతిపక్ష పార్టీలు చేసిన ప్రచారాన్ని ప్రజలు తిరస్కరించారు. అత్యధిక శాతం మంది ఆయనకే ఓటు వేశారు. తైవాన్ దేశానికి ప్రత్యేక గుర్తింపు కోసం డీపీపీ పోరాడుతున్నది. చైనాకు వ్యతిరేకంగా గళం ఎత్తుతోంది. తైవాన్ ఆల్ రెడీ స్వతంత్ర దేశమని.. మళ్లీ ఆ విషయాన్ని నిరూపించుకోవాల్సిన అవసరంలేదని ఈ ఎన్నికల్లో లై చింగ్ ప్రకటించారు.
కొత్త ప్రెసిడెంట్పై చైనా ఒత్తిళ్లు!
ఎన్నికలకు ముందు లైచింగ్ను చైనా ప్రమాదకరమైన వేర్పాటువాది అని పలుసార్లు విమర్శించింది. చర్చల కోసం ఆయన ఇచ్చిన పిలుపును తిరస్కరించింది. తైవాన్ ఎన్నికలకు ముందు చైనా అధ్యక్షుడు షీ జిన్ పింగ్ ఓ కార్యక్రమంలో మాట్లాడుతూ తైవాన్ చైనాలో భాగమని, మాతృభూమి పునరేకీకరణ తప్పక చేస్తామని ప్రకటించారు. ఆ దేశంలోని అధికార డీపీపీ తైవాన్ స్వాతంత్ర్యానికి మొండిగా పట్టుబడితే.. వాణిజ్య ఆంక్షలు పెడతామని హెచ్చరించారు. ఈ నేపథ్యంలో లై చింగ్ విజయం చైనాకు నచ్చకపోవచ్చని గ్లోబల్ పొలిటికల్ఎక్స్పర్ట్స్ అభిప్రాయపడుతున్నారు. అలాగే ప్రెసిడెంట్గా ఎన్నికైన అతనిపై ఒత్తిడి తెచ్చేందుకు ఆ దేశం ప్రయత్నించే అవకాశం ఉందంటున్నారు.
