ఇంటర్మీడియట్ రేంజ్ మిసైళ్లను తయారు చేయొద్దు.. పరీక్షించొద్దు’.. ఇదీ ఇంటర్మీడియట్ న్యూక్లియర్ ఫోర్సెస్ (ఐఎన్ఎఫ్) ఒప్పందం. ఆ మిసైళ్ల తయారీ, వాడకాన్ని నిషేధిస్తూ పెట్టిన బిల్లు కూడా అమెరికా కాంగ్రెస్లో పాసైంది. కానీ, ఐఎన్ఎఫ్ ట్రీటీతో పాటు తన సొంత బిల్లునే ఉల్లంఘించింది అమెరికా. పసిఫిక్ మహా సముద్రంపై ఆ రేంజ్లోని బాలిస్టిక్ మిసైల్ను పరీక్షించింది. ‘‘భూమి నుంచి ప్రయోగించే బాలిస్టిక్ మిసైల్ను అమెరికా రక్షణ శాఖ పరీక్షించింది. గురువారం ఉదయం 8.30 గంటలకు కాలిఫోర్నియాలోని వాండెన్బర్గ్ ఎయిర్ఫోర్స్ బేస్ నుంచి ఆ మిసైల్ను పరీక్షించారు. దాదాపు 500 కిలోమీటర్ల దూరం ప్రయాణించాక అది సముద్రంలో పడిపోయింది. ఈ పరీక్షలో తేలిన విషయాలను రక్షణ శాఖకు తెలియజేస్తాం. భవిష్యత్తులో ఆ మిసైల్ను మరింత అభివృద్ధి చేస్తాం” అని పెంటగాన్ ప్రతినిధి లెఫ్టినెంట్ కర్నల్ రాబర్ట్ కార్వర్ తెలిపారు.
ఏంటీ ఆ ఒప్పందం?
భూమి నుంచి ప్రయోగించే బాలిస్టిక్, క్రూయిజ్ మిసైళ్లు, మిసైల్ లాంచర్లను నిషేధిస్తూ 1987లో రష్యాతో చేసుకున్న ఒప్పందమే ఈ ఐఎన్ఎఫ్ ట్రీటీ. ఆ ఒప్పందం ప్రకారం 500 కిలోమీటర్ల నుంచి వెయ్యి కిలోమీటర్ల వరకు రేంజ్ ఉన్న ఏ మిసైల్నూ అమెరికాగానీ, రష్యాగానీ, ఇతర నాటో దేశాలుగానీ అభివృద్ధి చేయడంగానీ, పరీక్షించడం గానీ నిషిద్ధం. కానీ, రష్యా ఆ ఒప్పందానికి తూట్లు పొడుస్తూ మిసైళ్లను తయారు చేస్తోందని అమెరికా ఎప్పటి నుంచో ఆరోపిస్తోంది. ఎస్ఎస్ఈ–8/9ఎం729 అనే మిసైల్ను ఇప్పటికే రష్యా రెడీ చేసి మోహరించిందని అమెరికా, నాటో సభ్య దేశాలు ఆరోపించాయి. ఆ ఆరోపణల నేపథ్యంలోనే ఈ ఏడాది ప్రారంభంలో అమెరికా ఆ ట్రీటీ నుంచి బయటకొచ్చేసింది. ఆగస్టులో మొట్టమొదటిసారిగా క్రూయిజ్ మిసైల్ను ప్రయోగించింది. ఇప్పుడు రెండోసారి బాలిస్టిక్ మిసైల్ను టెస్ట్ చేసింది.