సెర్చ్ ఇంజిన్గా మొదలైన గూగుల్... గూగుల్ మ్యాప్స్, ఫొటోస్, మీట్ అని చాలా సర్వీస్లు అందిస్తోంది. ఇతర యాప్ కంపెనీల నుంచి పోటీని తట్టుకునేందుకు ఎప్పటికప్పుడు యూజర్ల కోసం కొత్త అప్డేట్స్ తీసుకొస్తోంది. ఈ సారి యాడ్స్ని స్కిప్ చేసే ఫీచర్, యూట్యూబ్లో గూగుల్ మీటింగ్స్ లైవ్ స్ట్రీమింగ్, ఫొటో ఎడిటింగ్ ఫీచర్లు తెచ్చింది గూగుల్.
వాట్సాప్ నుంచి గేమింగ్ యాప్స్ వరకు ఏ యాప్ కావాలన్నా గూగుల్ ప్లే స్టోర్లో నుంచి డౌన్లోడ్ చేసుకుంటాం. యాప్స్ వల్ల యూజర్ల సేఫ్టీ, ప్రైవసీకి ఇబ్బంది రాకుండా ఎప్పటికప్పుడు కొత్త అప్డేట్స్ తీసుకొస్తుంటుంది గూగుల్. అలా ఈసారి ఏం తెచ్చిందంటే... యాప్స్ని వాడేటప్పుడు మధ్యలో యాడ్స్ వస్తుంటాయి. వాటిలో కొన్నింటికి స్కిప్ యాడ్ ఆప్షన్ వస్తుంది. మరికొన్నింటికి స్కిప్ యాప్ ఆప్షన్ రాదు. దాంతో యాడ్ పూర్తయ్యే వరకు ఆగాలి. ఇకపై యాడ్స్ డిస్టర్బెన్స్ ఉండకుండా స్కిప్ చేయడం కుదరని, ఇబ్బందికరంగా ఉండే యాడ్స్, యాప్స్ని నిలిపివేయనుంది గూగుల్. అంతేకాదు 15 సెకన్ల వరకు క్లోజ్ చేయలేని ఫుల్స్క్రీన్ యాడ్స్కి పర్మిషన్ ఇవ్వొద్దని కూడా యాప్ డెవలపర్స్కు చెప్తుందట. సెప్టెంబర్ 30 నుంచి ఈ ఫీచర్ అందుబాటులోకి వస్తుందని గూగుల్ ప్రతినిధులు చెప్తున్నారు.
స్పీడ్ ఎంత ఉండాలో చెప్తుంది
కొత్త ప్లేస్కి వెళ్తున్నా, దారి తెలియకపోయినా గూగుల్ మ్యాప్ వాడతారు చాలామంది. దగ్గరి దారి చూపించడమే కాదు ఇకనుంచి ‘ఏ స్పీడ్లో బండి నడపాలి?’ అనేది కూడా చెప్తుంది గూగుల్ మ్యాప్స్. ఈ ఫీచర్ని బెంగళూరులో టెస్ట్ చేస్తోంది. స్పీడ్ లిమిట్ ద్వారా జంక్షన్లు, క్రాసింగ్ల దగ్గర ఎక్కువ సేపు ఆగకుండా చూసుకోవచ్చు. అంతేకాదు ఎక్కడ రోడ్లు మూసేశారు, కార్బన్ మొనాక్సైడ్ వంటివి గాలిలో ఎంత శాతం ఉన్నాయి అనేవి కూడా తెలుసుకోవచ్చు. త్వరలోనే ఈ ఫీచర్ని కోల్కతా, హైదరాబాద్లో అందుబాటులోకి తెస్తుంది గూగుల్.
గూగుల్ ఫొటోల్ని ఎడిట్ చేయొచ్చు
గూగుల్ ఫొటోస్లో వీడియో ఎడిటింగ్ ఫీచర్ రాబోతోంది. ఈ ఫీచర్ క్రోమ్బుక్ యూజర్లకు ముందుగా అందుబాటులోకి రానున్నదట. ఈ ఫీచర్ ఉంటే.. యూజర్లు తమ వీడియోలకి నచ్చిన పాటని బ్యాక్గ్రౌండ్ మ్యూజిక్గా పెట్టుకోవచ్చు. వాటికి నచ్చిన థీమ్తో, ఇష్టమైన వాళ్ల ఫొటోల్ని యాడ్ చేసుకోవడమే కాకుండా టైటిల్ కార్డ్స్ కూడా పెట్టుకోవచ్చు. అంతేకాదు ఫొటోలు, క్లిప్స్ని సెలక్ట్ చేసుకొని ఆర్డర్లో పెట్టొచ్చు.
పిక్సెల్ ప్రొ బడ్స్
హెడ్ఫోన్ల బదులు చాలామంది వైర్లెస్ ఇయర్బడ్స్ వాడుతున్నారు. ఈమధ్యే గూగుల్ కూడా పిక్సెల్ ప్రొ బడ్స్ పేరుతో కొత్త ఇయర్బడ్స్ తీసుకొచ్చింది. వీటి సౌండ్ క్వాలిటీ బాగుంటుంది. బ్యాటరీ ఏడు గంటలు వస్తుంది. వీటిలో సిక్స్–కోర్ ప్రాసెసర్ ఉంది. అంతేకాదు గూగుల్ అసిస్టెంట్ వాయిస్ యాక్టివేషన్ కూడా చేసుకోవచ్చు. వీటి ధర రూ.19,900.
యూట్యూబ్లో లైవ్ స్ట్రీమింగ్
గూగుల్ మీట్ యూజర్ల కోసం యూట్యూబ్ స్ట్రీమింగ్ అనే కొత్త ఫీచర్ తీసుకొస్తోంది గూగుల్. ఈ ఫీచర్ ద్వారా మీటింగ్స్ని యూట్యూబ్లో లైవ్ స్ట్రీమ్ చేయొచ్చు. గూగుల్ మీట్ సెషన్ని నిర్వహించే అడ్మిన్లకు దీనిమీద కంట్రోల్ ఉంటుంది. ఎన్జీవోలు తమ సేవా కార్యక్రమాల గురించి, స్థానికులు తమ సమస్యల గురించి అందరికీ చెప్పడానికి ఈ ఫీచర్ చాలా ఉపయోగపడుతుంది. లైవ్ స్ట్రీమింగ్ను పాజ్ చేయొచ్చు, రీ–ప్లే చేయొచ్చు. అయితే... యూట్యూబ్లో లైవ్ స్ట్రీమింగ్ చేయడానికి ముందు వాళ్ల యూట్యూబ్ ఛానెల్ లైవ్ స్ట్రీమింగ్కి అనుమతించాలి. ఇందుకు ఒక రోజు పడుతుంది. అంటే... గూగుల్ మీటింగ్స్ లైవ్ స్ట్రీమింగ్ కోసం ఒకరోజు ముందే యూట్యూబ్ వాళ్ల అప్రూవల్ తీసుకోవాలి.