ఈ రోజులలో చిన్న ఫంక్షన్ అయినా చాలు.. భోజనాల సెక్షన్ దగ్గరకు వచ్చేసరికి బఫె సిస్టమ్ కు అలవాటు పడిపోయిన్రు.. కూసోడం అనే పద్దతే లేదు.. అక్కడున్నవన్ని ఓ ప్లేట్లో పెట్టుకోవడం.. ఓ మూల నిలబడి ఓ చేత్తో పట్టుకొని మరో చేత్తో తినడం.. అలా డస్ట్ బిన్ లో పారేసి గుక్కెడు నీళ్లు తాగడం.. ఇది ప్రస్తుతం జనరేషన్ .. ఇలా తింటే ఒంటికి పట్టకపోగా.. ఆరోగ్య సమస్యలు కూడా వస్తాయని వైద్య నిపుణులు చెబుతున్నరు.
రాజయ్య తన దోస్తు కొడుకు పెండ్లికి పోయిండు. పెండ్లి మస్తు గ్రాండ్గా అయింది. బఫె పెట్టిన్రు... అరవై రకాల వంటలు. లైన్ కట్టి కొన్ని ఐటమ్స్ ప్లేట్ల పెట్టుకొని పోయి నిలవడి తినే సరికి సరిపోయింది. 'గిన్ని తిన్న తృప్తి లేదు రా ... భయ్.. అవన్నీ వేస్టు.. అప్పట్లో ఇస్తరేసి.. బగారన్నంల రెండు మటన్ ముక్కలేసి షోర్వా పోసినా.. బాగుంటుండే... ఇప్పుడు ఎన్ని ముక్కలేసినా... ఆ మజా వస్తలేదు' అని పాత రోజులను గుర్తు చేసుకోంగనే నోట్లో నీళ్లు ఊరినయ్. అప్పటి అన్నం కూరే ఆయనకు ఎందుకంత టేస్ట్ అనిపించిందో..? ఆ సీక్రెట్ ఇయ్యాల తెలిసింది...!
ALSO READ | Cancer Foods: ఈ 6 ఫుడ్స్ తింటే క్యాన్సర్ వస్తది.. తేల్చి చెప్పింది హార్వర్డ్ డాక్టర్లు
ఇస్తరిలో తిన్నందుకేమో' అనుకుంటున్నరు కదా? కాదు! మీరు అన్నం ఎట్ల తింటరు? చెయ్యితోనా.. చెంచాతోనా? అని అడగట్లేదు. కూర్చొని తింటరా? నిలవడి తింటరా? నిలవడి ఏం తిన్నా రుచి. పచి ఉండదంట. కూర్చొని పచ్చడి మెతుకులు తిన్నా.. మస్తు టేస్ట్ ఉంటదంట! ఇగ కింద కూసొని తింటే దానికి రెట్టింపు రుచిగుంటదంట! అందుకే రాజయ్యకు ఇస్తరిలో తిన్న అన్నం కూర రుచి ఇంకా మర్చిపోలె. ఈ ముచ్చటే ఇప్పుడు అమెరికా పరిశోధకులు స్టడీ చేసి చెప్పిన్రు. 'తినేది టేస్ట్ ఉండాలంటే కూసొని తీనుండ్రి' అని అంటున్నరు వాళ్లు. 'నిలవడి తింటే.. ఫిజికల్ స్ట్రెస్ పెరుగుతది. టేస్ట్ బడ్స్ (రుచి మొగ్గలు) డుచుకపోతయ్' అని చెప్పిన్రు పరిశోధకులు.
జర క్యాలెండర్ని వెనకకు తిప్పితే.. తాతల కాలంల కింద కూసొని తింటుండె. తర్వాత తరం ముక్కాల పీట మీద కూసొని తిన్నది. అక్కడి నుంచి చిన్నగా డైనింగ్ టేబుల్ మీదికొచ్చిను. ఇప్పుడు పక్క దేశపోళ్లని చూసి బఫెకి అలవాటు పడి నిలవడే తింటున్నరు! టేస్ట్ కూడా అట్లనే తగ్గుకుంట వచ్చింది. కూర్చొని తింటున్నప్పుడు, నిలవడి తింటున్నప్పుడు రుచికి సంబంధించిన గ్రంథులు ఎట్లా పని చేస్తయో పరిశోధకులు పసిగట్టిన్రు. యూనివర్సిటీ ఆఫ్ సౌత్ ఫ్లోరిడాలో ప్రొఫెసర్గా పని చేస్తున్నదిప్యాన్ బిస్వాస్ దీనికి నేతృత్వం వహించిండు. ఈ కథంతా జర్నల్ ఆప్ కంజ్యూమర్ రీసెర్చిలో పబ్లిష్ అయింది..
–వెలుగు,లైఫ్–
